بره شوية

Saturday, June 30, 2007
الزعيم مسافر ..حيجى قريب اوعى حد يسافر انا حقفل البلد من بره عشان عارفكم
 
posted by الريس at 1:58 AM, | 2 comments

واحد وبشرطة

Tuesday, June 19, 2007
تووووووووووووووووت توووووووووووووووت

لا مش قطر ديه زمارة عندى فى الفيلة لما بحب انادى الشعب بضرب عليهاوابدا اكلم فى الميكروفون للى اخدتهم من الحج على بتاع الفراشة ..معاك حق وللى سكنين بعيد يسمعونى فى الراديو

سؤال منطقى انا محدش حيشوف وشى من الشعب اصلن ولا حد حيبقى عارف هو الزعيم ده لابس نضارة ولا اديدس ليه بقه اوقلك ..عشان

لما اعوز اعدى عليهم واعرف اخبرهم ممكن لما اتعب واقعد على القهوة محدش يحطلى حاجة فى الشاى , او بعد الشر يعنى لو مرعى بتاع

..الكليمة جاب حد يوقعنى من السطلة هوبة اختفى وخليهم يجبونى بقه ..هاااااااااااااااااا ناصح صح ياشعب .؟؟؟

يابو النصاحة يازعيمنا مفيش غيرك حبيبناااااا

احنا حلينا اخر مرة مشكلة التعليم ..بس الحاجة الكبيرة للى انا واخد بالى منها ان فلوسنا على قدنا وولاد قريبنا معاهم قد كده
حنحل المشكلة ديه بعد الفاصل..لحظااااات

عدنااا

والله انا شايف ان من اسباب ان اسباب القوة متوزعة علينا احنا وولاد عمنا انها رسالة عشان نتحد ونبقى اقوى وبتاع..لكن قدرنا ان فيه ناس عقلها طخين وبيحوطوا غسيل على دماغهم او للى من غير غسيل بس عندهم كلاكيع جوه مش عارفين نتحد بسببهم ..ومن نعمة ربنا عليكم ان للى عندهم كلاكيع انا شلتهم اتفضل مين ؟؟ ايووه للى حاطين غسيل طبعا مهما شرحتلهم مش حيفهموا او حيصهينوا عشان يحافظوا على السطلنية او المملكوية فمش حيوافقوا يتحدوا معنا , فانا حضمهم باستخدام القوة التفاضلية - الجبرية سابقا -وبمزاجهم للى هو يساوى مزاجى يعنى حنكون مع بعض, بس انا الريس برضه واول حاجة حعملها ,,البنات للى بيرقصوا عندهم بس مش بيهزو وسطهم لا بيلفوا شعرهم فى دواير حشغلهم عندنا فى المولد بدل الرجل للى بيلبس جونلة كبيرة ده..ومين عارف ممكن بالاتحاد ده نعمل اول فيلم كارتون الواحد يفهم منه حاجة او المعلقين بتوعوا ميكونوش كلهم كونان ..ايه الكلام ده ماعلينا الوقت اتاخر والزعيم عاوز ينااام سلام يا شعب


 
posted by الريس at 1:50 PM, | 4 comments

خطبة رقم واحد

Wednesday, June 13, 2007
سننتقل الان لبث خارجى لنقل وقائع الخطبة العصماء للزعيم المبجل ملك فونيا..الى هناااك

" الووو 1 ...2 ...3 سمعنيى يا شعب..........بمناسبة صدور الالبوم الجديد بتاع الست هيافة للاطفال حخطب فيكم النهاردة رغم انى مش بحب الكلام على الفاضى..فحتكلم النهارة على البحر..حنتكلم النهاردة عن موضوع البطالة طلعت وبصيت عليكم من فوق كده عشان اعرف ليه مش بتشتغلو فلقيت ان اصلن العيب فى نظام التعليم فالناس بتطلع مش مناسبة لسوق العمل ...فققرت خطة تزويل التعليم للى ختخلى البلد شوربة قولوا هيه..هيييييييييييييييييييييييييه..الاول كل الناس بعد متتخرج نسفرها امريكا تعمل دكتوراة وتاخد الجنسية الامريكانى , قشطه؟ وبعد كده نجيبهم كل سبت وتلات يعملوا خطبة فى دار الاوبرا ويحكو عن حكاويهم برة وطبعا عشان مننكرش الجميل حنسمى على اسم كل واحد منتج من شركة الشامبو بتاعتى ...وللى مش حيعرف يسافر نبعته السعودية عاوزين مديرين منازل هناك.ومتنسونيش فى الحلاوة "

فاصل ونعود


الخطبة الرئاسية برعاية ..فونياهون شبكة المتشال الاولى فى الدنيا

عشان تسمع الريس صح اشترى سمعات ابو ودن

 
posted by الريس at 3:52 AM, | 10 comments

مرسوم اتنين

Friday, June 8, 2007
رجعتلكم تانى يا شعب...اه عارف انى اتاخرت بس والله مشاغل كان عندى امتحان..ااا..ﻷا اقصدى كنت مسافر تركيا
حنجيبلكم شحنة صابون بريحة وبسعر الجملة

هيييييييييييييييييييييييييييييييييييه حننضف

اه موضوع العروسة خليه بعدين عشان فكرى مشغول بحاجات تانية...انا كنت زيكم مواطن وبعيش وبتعايش مع للى بيحصل لينا وفينا
وعشان انا منكم وابن الداير.. ااا قصدى ابن الجمهورية فححاول اريحكم من الحاجات للى كانت بتقرفنى واكيد حشوفلكو حاجت تانية عشان التجديد امال حتكونو مبسوطين ولا ايه..هااااااااااااااااااااااع

احنا ولادك يازعيم ان شاء الله حناكل برسيم

تمام يا شعب...حروح شوية وجاى اصلى تعبت من الكلام..فاصل نعود

عدنا ا .. مين بيخبط فى الوقت اللى مش مناسب ده .." غضب رياسى " مين حضرتك اوعى تكون مندوب مبيعات..ايه صحفى ..طب تمام اووى اتفضل...واحد سحلب يا عبده


ممكن يا سعادة الزعيم نعمل لقاء مع سيادتك ؟

ليييييييه؟؟؟ هو تحقيق انتا مش عارف انتا بتكلم مين عااااااااااااااااع وكمان منا للى حقولهولك عن للى عملته معملتهوش وللى حقولك انى حعمله مش عامله...بس مش حكسفك عشان خاطر اول مرة تجيلى القصر

تقول ايه عن المجتمع بتاعنا قبل متحكم ؟

والله انا شايف ان الفونيا عبارة عن

حرامية شرعيين : دول ناس بتسرق بس بمزاجنا وبتعيش على قفاكم انا طبعا لا هااااااااع

اساتذة الفول : ومش قصدى على الاساتذة بتوع اولى رابع ..قصدى على ناس بتبقى مسئولة عن تخطيط حاجات
كتير تعليم , مواصلات ,اقتصاد , تنظيم الدولة وخلافه وطبعا اثر الفول باين جدا زى مبيقولوا طاغى على شغلهم

بتوع الحل بالكتكوت : ناس شايفه انها فوق الكل وان هما للى فاهمين كل حاجة ومعظمهم كان عامل بلاوى قبل كده
وصعبت عليه نفسه وهو مرة نايم على جنبه فقرر الرجوع للكتكوت عشان يرضى ضميره ..ودول للى مساعدهم
انهم ليهم صحاب برة عاوزين الفونيا تتقلب ودول فكرين انهم ناصحين وبيعملوا الصح وطبعا اخرهم حيشتغلوا خايطين
عشان يقصروا الجلبية ويسيبوا التانيين على القمر

غلابة : الناس الطيبة للى فاكرين ان بتوع الكتكوت هما الكويسين واللى بيشتعبطوا فى الترماى والميكروباصات
وغالبا لما بيموت لو حيبت عمل ايه فى حياته حتلاقيها انحصرت بين : مرواح الشغل ..ركوب المواصلات..خناق مع المدام..دفع الضرايب ..طلوع المعاش ونزوله..بس

اسكت ونكمل كمان شوية تعبت ده انتا رغاى بشكل

عدنا

تفتكر ان الحل كان فى اقامة دولة تعتمد على الدين زى مبتوع الكتكوت عاوزيين؟

طبعا لا .. كل الاديان السماوية بتقولك اشتغل وحافظ على الامانة ومتكدبش
وبتأمرك تخلى بالك من اهلك..وبتختلف فى ايه فى اساسيات تعبد للى بيصوم خالص
وللى بياكل من غير روح وكده.. طب مالسعودية دولة دينية عملوا ايه؟ ولا حاجة بس زى
للى ابوه سيبله شنطة وبيصرف منها لما البترول يخلص حيبيعوا لب..الحل ان الناس تشتغل بجد تتقن فى شغلها , تخاف على بلدها, يبقى عندها طموح فى الرقى وامل ان بكرة اكيد احلى وطبعا الناس للى فوق لازم تتشال كلها ويجى ناس زيى طبعا وحتشوف انا حعمل ايه اصبر عليا بس .


ايه رى سعدتك فى خروج البنات للعمل ؟

تخرج ليه لا .. بس مش اى شغلانة تخرجها ولو عاوزة تخرجوتبقى زيها زيي لما تدخل محاضرة ومتلقيش كرسى متستناش
ان حد يقفلها ولا انها متقفش تصور ورق وتخلى فلان يصورها وغيره وغيره...لكن فيه ناس بتحبها تخرج
المديرين ام عيون زايغة والدكاترة بتوع الامتحانات الشفو ى , مش حقلك البنت زى الجوهرة لازم نحافظ عليها عشان متقوليش قديمة ..البنت بالنسبة ليا زى الرامة بتاعت الكومبيوتر عاوزة تيار دى سى وقليل ومن اقل حركة بتتحرق.. فتتحط فى مكانها احسن واكيد مش فى اى حتة حتشتغل , فكل واحد ميسر لما خلق له الرامة غير البور سبلاى


طب ومشكلة البطالة حتحلها ازاى؟

لا ديه بالذات حخليها البوست الجا...ااا قصدى المرسوم الجاى..خلصت السحلب ..طب روح بدرى قبل معبده يطلع الكتاكيت يتمشوا شوية



 
posted by الريس at 4:20 PM, | 5 comments

مرسوم رقم واحد

Thursday, May 31, 2007
قررت بالاصالة عن نفسى وبعلمى بمدى حبكم لى..واعترفا منى بفضلك على عائلتى الملكية قررت ان اتولى - بناء على رغباتكم - حكم الفونيا
وياريت مترجعوش تندموا ولا تقولوا امتى يموت عشان انا مش لوحدى ليا ولااااااد كتير وولاد ولاد اكتر..عااااااااااااااااااااااااو

القرارات :

1- اغلاق جميع الجرائد الحكومية والمعارضة : فالحكاية مش ناقصة دوشة وخوتة وفى الاخر محدش بيفهم حاجة وانتو اللى مضرورين بالفلوس للى بتضيع على الفاض نكبر منها احسن وعليا حعملكو مجلة من تحريرى انا بس لما افضى شوية من دوشة المهنئين

2- الغاء المجالس النيابية والشعبية والاحزاب : معندناش الكلام الفاضى ده..اللى عاوز حاجة باب فيلتى مفتوح اسئل عم عبدو البواب انا فين ويحدلك علطول..يا خونا انا منك واليكم حتى اسئلو ام فتحى

3- الغاء نظم التعليم كلها : النظم كلها فاشلة حعملكم نظام برضه بس اصبروا اخلص الشاى للى فى ايدى

4- تغيير شعار الفونية : اشمعنى البلاد كلها ليها شعار, حعملكم استفتاء بس على بكرة كده نشوف نخليه ايه

6- كفاية كده انا زهقت بعدين حقولكم..اتفرجوا على العاشرة مساء وناموا بدرى سلام يا شعب

عدنا

ايه نمتو , حد بينام دلوقتى ..اصحى يا شعب , كنت عاوز اخد رايكم فى حاجة انا قعدت شوية كده مع نفسى قمت زهقت منها , بقول ان الوحدة بتقتلنى وطبعا ميرضكوش انى اموت ولا ايه هااااااااااااااااع

بالرز بالعدس نفديك يا زعيم

تمام يا شعب انا بحبكم والله..المهم شفولى بنت زى القمر منكم بتعرف تشتغل على النت وياريت يكون عندها ويب سايت عشان تونسنى

بس حنعرفها ازاى يا زعيم كل بناتنا زى القمر - معتم يعكس نور الشمس - والكل بيقعد فى سيبرات يعنى هاى تك

خلاص عشان متتلخبطوش..عاوزها هيفا الشكل عجرمية الصوت رقيقة الحاشية..تعرف ميكروسوفت ورد..لا تخاطب العرب تكتب فرانكو...مش بتسمع اسامة منير - فكرونى اقبض عليه - ولو الشبكة التالتة للى 3.5 يبقى فل اووى
تقدم الطلبات كمان شوية اوعو تتاخرو


 
posted by الريس at 12:42 PM, | 7 comments